دسترسی ها

عبدالله عبدالله، رئیس اجرائی دولت جمهوری اسلامی افغانستان امروز (پنجشنبه ۱۹ میزان/ مهر) در رأس یک هیأت بلندپایه دولتی که به منظور اشتراک در هفدهمین اجلاس سران حکومت‌های سازمان همکاری‌شانگهای عازم دوشنبه پایتخت جمهوری تاجیکستان گردید.

در این سفر صلاح‌الدین ربانی، وزیر امورخارجه جمهوری اسلامی افغانستان و تعدادی از مسئولین حکومتی رئیس اجرائی افغانستان را همراهی می کنند.

عبدالله در اجلاس سران حکومت‌های سازمان شانگهای که سالانه برای ارزیابی وضعیت منطقه و سیاست‌های این سازمان برگزار می‌گردد به نمایندگی از جمهوری اسلامی افغانستان اشتراک و سخنرانی می‌کند.

رئیس اجرائی دولت افغانستان در حاشیه نشست سران حکومت‌های شانگهای با رئیس جمهور تاجیکستان، نخست‌وزیر روسیه، نخست‌وزیر چین٬ نخست‌وزیر ازبکستان، نخست‌وزیر قزاقستان٬ نخست‌وزیر قرغیزستان٬ نخست‌وزیر تاجیکستان، نخست‌وزیر بلاروس و وزیر امورخارجه هند دیدار می‌کند.